Ehersisyo at Dialysis

Ang palagiang ehersisyo ay makakapagpanatili sa iyong pisikal at mental na kalusugan habang nasa dialysis sa pamamagitan ng:

• Pagtaas ng iyong antas ng enerhiya
• Pagtulong sa iyo na makontrol ang iyong timbang
• Pagpapabuti ng iyong panunaw
• Pagpapabuti ng kalidad ng iyong pagtulog
• Pagbawas ng stress at pagkabalisa
• Pagbawas ng panganib ng sakit sa puso
• Pagtulong sa iyo na makontrol ang iyong asukal sa dugo at presyon ng dugo
• Pagtulong sa iyo na labanan ang pagkalumbay at manatiling positibo
• Pagbaba ng iyong antas ng kolesterol
• Pagbibigay sa iyo ng mga pagkakataon para makisalamuha
• Pagpapalakas ng iyong kalamnan

Ang pagpili ng mga aktibidad kung saan nasisiyahan ka ay maaaring makatulong sa iyo na manatili sa iyong plano sa ehersisyo sa buong gamutan. Kausapin ang iyong klinika tungkol sa kung anong mga uri ng ehersisyo ang magiging komportable at angkop para sa iyo. Isaalang-alang din ang paghahanap ng mga oportunidad upang maging aktibo kasama ang mga kaibigan o pamilya upang mas maging masaya ang karanasan.

Ang mga ehersisyo na pwede mong gawin sa labas habang nasa dialysis ay ang mga sumusunod:

• Mabilis na paglakad
• Banayad na paglalalakad
• Pagja-jogging
• Pagbibisikleta

Ang mga ehersisyo na pwede mong gawin sa loob habang nasa dialysis ay ang mga sumusunod:

• Naglalakad o nagja-jogging sa treadmill
• Pagsasayaw
• Panloob na pagbibisikleta
• Paglangoy (depende sa iyong piniling gamutan)
• Paggamit ng kagamitan sa pag-eehersisyo

Ang sinumang nasa dialysis ay maaaring mag-ehersisyo. Gayunpaman, mahalaga na ang uri ng aktibidad na iyong ginagawa ay naaangkop para sa iyong edad, antas ng kakayahan at pisikal na kondisyon. Bago ka magsimula ng anumang tukoy na ehersisyo, mahalagang sabihin mo ito sa iyong klinika. Ang paggawa ng plano sa pag-eehersisyo ay maaaring isang mahusay na paraan upang subaybayan kung gaano kaliit o kalaki ang pagprogreso ng iyong paggalaw at mapanatili kang nakatuon sa iyong health goals.

Ang mga panuntunan para sa pag-eehersisyo habang nasa dialysis ay magkakaiba sa bawat tao, ngunit may ilang mga pangkalahatang gabay na dapat mong tandaan kapag pinaplano ang iyong mga aktibidad.

Kung ikaw ay nasa PD, dapat mong iwasang mag-ehersisyo kung ang iyong peritoneal cavity ay puno ng dialysis fluid. Maaaring hindi maging komportableng gumalaw kung puno ang tiyan. Kung meron kang diabetes, pagtuunan ng pansin ang iyong antas ng asukal sa dugo. Maaari itong bumaba kapag nag-eehersisyo, at maaaring dapat mong ayusin ang iyong mga medikasyon.

Ang pag-eehersisyo ng isa o dalawang beses sa isang linggo ay maaaring maging kapaki-pakinabang sa iyong kalusugan. Ngunit mas maganda na nakakapag-ehersisyo ng di baba sa 3 hanggang 4 na beses kada linggo, kung maaari. Ganunpaman, huwag mag-ehersisyo hanggang sa mapagod. Kapag nakaranas ng anumang sakit o kahirapan sa pisikal, ihinto ang pag-eehersisyo at makipag ugnayan sa iyong klinika para sa payo.